இறைவனின் அன்னையாகிய தூய கன்னி மரியா பெருவிழா
(01 சனவரி 2025)
திருப்பலி முன்னுரை
வருடத்தின் முதல் நாளாகிய இன்று இயேசு பிறந்து 8ம் நாளாகும். இறைமகனுக்கு இயேசு எனப்பெயரிடப்பட்ட இந்நாளில் அன்னையாம் திரு அவை “தூய மரியாள் இறைவனின் தாய்” என்னும் பெருவிழாவை கொண்டாட எம்மை அழைக்கின்றது. அன்னை மரியாள் இயேசுவின் தாய் மட்டுமல்ல. திருஅவைக்கும், எமக்கும் தாயாக விளங்குகின்றாள்.
முதல் வாசகம், மோசே வழியாக ஆண்டவர் இஸ்ராயேலருக்கு வழங்கிய ஆசீர்வாத வார்த்தைகளை எடுத்துரைக்கின்றது. இரண்டாம் இறைவாக்கில் “கடவுளின் ஆசீர் தம் மகன் கிறிஸ்து வழியாக அனைவருக்கும் வழங்கப்பட்டுள்ளதாக புனித பவுல் கலாத்தியர்களுக்கு கூறகின்றார். நற்செய்தியில் இடையர்கள் தாங்கள் கேட்டறிந்த, கண்டறிந்த கிறிஸ்து பிறப்புச்செய்தியை யாவருக்கும் அறிவித்ததையும், குழந்தைக்கு “இயேசு” என பெயரிட்டதையும் இறைவார்த்தையாக வாசிக்க கேட்போம்.
இப்புதிய ஆண்டில் எமக்கெல்லாம் அன்னையாகிய தூய மரியாவின் பரிந்துரையை வேண்டுவதோடு, தினமும் இறைவார்த்தையை தியானித்து, நம்பிக்கையுடனும், அமைதியுடனும் அனைவரும் ஒன்றாக இணைந்து மீட்பு எனும் ஒளியைக் காண, இறைவன் தமது திருமுக ஒளியை எம்மீது திருப்பி ஆசீரால் நிரப்பிட வேண்டுமென்று தொடரும் பலியில் மன்றாடுவோம்.
முதல் வாசகம்
இஸ்ரயேல் மக்கள்மீது நமது பெயரைக் கூறி நீங்கள் வேண்டும்போது, நாம் அவர்களுக்கு ஆசி அளிப்போம்.
எண்ணிக்கை நூலிலிருந்து வாசகம் 6: 22-27
ஆண்டவர் மோசேயிடம் கூறியது: நீ ஆரோனிடமும் அவன் புதல்வரிடமும் சொல்; நீங்கள் இஸ்ரயேல் மக்களுக்கு ஆசிகூற வேண்டிய முறை: “ஆண்டவர் உனக்கு ஆசி வழங்கி உன்னைக் காப்பாராக! ஆண்டவர் தம் திருமுகத்தை உன்மேல் ஒளிரச் செய்து உன்மீது அருள் பொழிவாராக! ஆண்டவர் தம் திருமுகத்தை உன் பக்கம் திருப்பி உனக்கு அமைதி அருள்வாராக!” இவ்வாறே அவர்கள் என் பெயரை இஸ்ரயேல் மக்களிடையே நிலைநாட்டுவர்; நானும் அவர்களுக்கு ஆசி வழங்குவேன்.
– இது ஆண்டவர் வழங்கும் அருள்வாக்கு.
பதிலுரைப் பாடல்
திபா 67: 1-2. 4. 5,7 (பல்லவி: 1a)
பல்லவி: கடவுளே! எம்மீது இரங்கி, எமக்கு ஆசி வழங்குவீராக!
1கடவுளே! எம்மீது இரங்கி, எமக்கு ஆசி வழங்குவீராக! உம் திருமுக ஒளியை எம்மீது வீசுவீராக!2அப்பொழுது, உலகம் உமது வழியை அறிந்துகொள்ளும்; பிற இனத்தார் அனைவரும் நீர் அருளும் மீட்பை உணர்ந்துகொள்வர். – பல்லவி
4வேற்று நாட்டினர் அக்களித்து மகிழ்ச்சியுடன் பாடிடுவராக! ஏனெனில், நீர் மக்களினங்களை நேர்மையுடன் ஆளுகின்றீர்; உலகின் நாடுகளை வழிநடத்துகின்றீர். – பல்லவி
5கடவுளே! மக்களினத்தார் உம்மைப் புகழ்வார்களாக! மக்கள் எல்லாரும் உம்மைப் போற்றுவார்களாக! 7கடவுள் நமக்கு ஆசி வழங்குவாராக! உலகின் கடையெல்லைவரை வாழ்வோர் அவருக்கு அஞ்சுவராக. – பல்லவி
இரண்டாம் வாசகம்
கடவுள் தம் மகனைப் பெண்ணிடம் பிறந்தவராக அனுப்பினார்.
திருத்தூதர் பவுல் கலாத்தியருக்கு எழுதிய திருமுகத்திலிருந்து வாசகம் 4: 4-7
சகோதரர் சகோதரிகளே,
காலம் நிறைவேறியபோது திருச்சட்டத்திற்கு உட்பட்டிருந்த நம்மை மீட்டுத் தம் பிள்ளைகள் ஆக்குமாறு கடவுள் தம் மகனைப் பெண்ணிடம் பிறந்தவராகவும் திருச்சட்டத்திற்கு உட்பட்டவராகவும் அனுப்பினார்.
நீங்கள் பிள்ளைகளாய் இருப்பதால் கடவுள் தம் மகனின் ஆவியை உங்கள் உள்ளங்களுக்குள் அனுப்பியுள்ளார்; அந்த ஆவி ‘அப்பா, தந்தையே,’ எனக் கூப்பிடுகிறது. ஆகையால் இனி நீங்கள் அடிமைகளல்ல; பிள்ளைகள்தாம்; பிள்ளைகளாகவும் உரிமைப்பேறு உடையவர்களாகவும் இருக்கிறீர்கள். இது கடவுளின் செயலே.
– இது ஆண்டவர் வழங்கும் அருள்வாக்கு.
நற்செய்திக்கு முன் வாழ்த்தொலி
எபி 1: 1-2
அல்லேலூயா, அல்லேலூயா! பலமுறை, பலவகைகளில் முற்காலத்தில் இறைவாக்கினர் வழியாக நம் மூதாதையரிடம் பேசிய கடவுள், இவ்விறுதி நாள்களில் தம் மகன் வழியாக நம்மிடம் பேசியுள்ளார். அல்லேலூயா.
நற்செய்தி வாசகம்
மரியாவையும் யோசேப்பையும் குழந்தையையும் கண்டார்கள். எட்டாம் நாள் அதற்கு இயேசு என்று பெயரிட்டார்கள்.
✠ லூக்கா எழுதிய தூய நற்செய்தியிலிருந்து வாசகம் 2: 16-21
அக்காலத்தில்
இடையர்கள் பெத்லகேமுக்கு விரைந்து சென்று, மரியாவையும் யோசேப்பையும் தீவனத் தொட்டியில் கிடத்தியிருந்த குழந்தையையும் கண்டார்கள். பின்பு அந்தக் குழந்தையைப் பற்றித் தங்களுக்குச் சொல்லப்பட்ட செய்தியைத் தெரிவித்தார்கள். அதைக் கேட்ட யாவரும், இடையர்கள் தங்களுக்குச் சொன்னவற்றைக் குறித்து வியப்படைந்தனர். ஆனால் மரியா இந்நிகழ்ச்சிகளையெல்லாம் தம் உள்ளத்தில் இருத்திச் சிந்தித்துக்கொண்டிருந்தார். இடையர்கள் தாங்கள் கேட்டவை, கண்டவை அனைத்தையும் குறித்துக் கடவுளைப் போற்றிப் புகழ்ந்து பாடிக்கொண்டே திரும்பிச் சென்றார்கள். அவர்களுக்குச் சொல்லப்பட்டவாறு எல்லாம் நிகழ்ந்திருந்தது.
குழந்தைக்கு விருத்தசேதனம் செய்யவேண்டிய எட்டாம் நாள் வந்தது. தாயின் வயிற்றில் உருவாகுமுன்பே வானதூதர் சொல்லியிருந்தவாறு அதற்கு இயேசு என்று பெயரிட்டார்கள்.
– இது கிறிஸ்து வழங்கும் நற்செய்தி.
நம்பிக்கையாளரின் மன்றாட்டுகள்
- அன்பின் ஆண்டவரே! இன்றைய உலகில் நற்செய்தி அறிவிக்க என நீர் தெரிந்து கொண்ட திருஅவையின் திருநிலைப் பணியாளர்களையும், பொதுநிலைப்பணியாளர்களையும், உம் கரம் தாங்கி அவர்ளை ஆசீர்வதித்து, உமது சித்தப்படி அப்பணியை முழுமனதுடன் நிறைவேற்ற உமது அருளை பொழிந்திட வேண்டுமென்று இறைவா உம்மை மன்றாடுகின்றோம்.
- அன்பின் ஆண்டவரே! பிறந்துள்ள இப்புதிய ஆண்டில் எம் ஒவ்வொருவருக்கும் உடல், உள, ஆரோக்கியம், பாதுகாப்பு, உழைப்பில் மேன்மை, கல்வியறிவு போன்றவற்றை நிறைவாகத் தந்து வழிநடத்த வேண்டுமென்று இறைவா உம்மை மன்றாடுகின்றோம்
- அன்பின் தந்தையே! நாம் அனைவரும் முழு மனத்தாழ்மையுடனும், பொறுமையோடும், ஒருவரையொருவர் அன்புடன் தாங்கவும், அர்ப்பணிப்புடன் திருஅவைக்காக உழைக்கவும், தூய ஆவி அருளும் ஒருமைப்பாட்டைக் காத்துக்கொள்ள முழு முயற்சி செய்யவும் வரமருள வேண்டுமென்று இறைவா உம்மை மன்றாடுகின்றோம்.
- அன்பின் மீட்பரே! கடவுளின் மீட்புத் திட்டத்தில் அன்னை மரியாளின் பங்கு அளப்பரியது என்பதை உணர்ந்து தினமும் குடும்ப செபமாலை சொல்லுதல், விவிலியம் வாசித்தல் ஆகிய நற்பழக்கத்தை எம் அன்றாட வாழ்வில் பழக்கப்டுத்திக்கொள்ள ஆண்டவரே எமக்கு ஆசீர் வழங்கவேண்டுமென்று இறைவா உம்மை மன்றாடுகின்றோம்.
