பொதுக்காலம் 2ஆம் ஞாயிறு (19 சனவரி 2025)
திருப்பலி முன்னுரை
இன்று பொதுக்காலத்தின் இரண்டாம் வாரமாகும். இறைவன் தரும் புதிய வாழ்வை பெற்றுக்கொள்ள மூவொரு கடவுளின் மேன்மையை உணர்ந்தவர்களாக, தூய ஆவியை நம் வாழ்வில் செயல்பட அனுமதிக்க வேண்டும் என எடுத்துரைக்கின்றது இன்றைய வாசகங்கள்.
ஏசாயா நூலில் எடுக்கப்பட்ட இன்றைய முதல் வாசகம், எல்லாம் வல்ல கடவுளை மணமகனாகவும், அன்னையாம் திரு அவையை மணமகளாகவும் விபரிக்கிறது. அருட்கொடைகள், ஆற்றல்கள், செயல் பாடுகள் பலவகையாக இருந்தாலும் தூய ஆவியார் ஒருவரே என்பதை திருத்தூதர் பவுல் கொரிந்தியருக்கு எழுதிய முதல் திருமுகத்தில் எடுக்கப்பட்ட இரண்டாம் வாசகம் நமக்குத் தெளிவுபடுத்துகிறது. கானாவூர் திருமண நிகழ்ச்சியில் திராட்சை இரசம் தீர்ந்தபொழுது, “அவர் உங்களுக்குச் சொல்வதெல்லாம் செய்யுங்கள்” எனப்படும் அன்னை மரியன்னையின் பரிந்துரையால் ஒரு புதுமை நிகழ்ந்ததைக் யோவான் நற்செய்தி எடுத்துரைக்கிறது.
தனது நேரம் வராத போதும் அன்னையின் சொல்கேட்டு திருமண வீட்டின் அவசியத்தேவையை நிறைவேற்றும் அற்புதத்தை செய்யும் ஆண்டவர் இயேசுவை எமது மீட்பராக ஏற்றுக் கொள்ளும் நாம், நமது அன்றாடத் தேவைகளில் இறையன்னையின் பரிந்துரையை நாடி, ஆண்டவரின் அருஞ்செயலால் நமக்குத் தரப்பட்டுள்ள ஆற்றலைப் பயன்படுத்தி இறை மாட்சியை வெளிப்படுத்துபவர்களாய் வாழும் வரம் கேட்டு தொடரும் திருப்பலியில் பக்தியோடு பங்கேற்போம்.
முதல் வாசகம்
மணமகன் மணப்பெண்ணில் மகிழ்வதுபோல் உன் கடவுள் உன்னில் மகிழ்வார்.
இறைவாக்கினர் எசாயா நூலிலிருந்து வாசகம் 62: 1-5
சீயோனின் வெற்றி வைகறை ஒளியெனவும், அதன் மீட்பு சுடர் விளக்கெனவும் வெளிப்படும்வரை, அதனை முன்னிட்டு மவுனமாயிரேன்; எருசலேம் பொருட்டுச் செயலற்று அமைதியாயிரேன். பிற இனத்தார் உன் வெற்றியைக் காண்பர்; மன்னர் யாவரும் உன் மேன்மையைப் பார்ப்பர்; ஆண்டவர் தம் நாவினால் சூட்டும் புதியதொரு பெயரால் நீ அழைக்கப்படுவாய். ஆண்டவரின் கையில் நீ அழகிய மணிமுடியாகத் திகழ்வாய்; உன் கடவுளின் கரத்தில் அரச மகுடமாய் விளங்குவாய்.
‘கைவிடப்பட்டவள்’ என்று இனி நீ பெயர் பெற மாட்டாய்; ‘பாழ்பட்டது’ என இனி உன் நாடு அழைக்கப்படாது; நீ ‘எப்சிபா’ என்று அழைக்கப் படுவாய்; உன் நாடு ‘பெயுலா’ என்று பெயர்பெறும். ஏனெனில், ஆண்டவர் உன்னை விரும்புகின்றார்; உன் நாடு மணவாழ்வு பெறும்.
இளைஞன் கன்னிப் பெண்ணை மணப்பது போல உன்னை எழுப்பியவர் உன்னை மணந்துகொள்வார்; மணமகன் மணப்பெண்ணில் மகிழ்வது போல் உன் கடவுள் உன்னில் மகிழ்வார்.
– இது ஆண்டவர் வழங்கும் அருள்வாக்கு.
பதிலுரைப் பாடல்
திபா 96: 1,2a. 2b-3. 7-8a. 9-10ac (பல்லவி: 3b)
பல்லவி: அனைத்து மக்களுக்கும் ஆண்டவரின் வியத்தகு செயல்களை அறிவியுங்கள்.
1ஆண்டவருக்குப் புதியதொரு பாடல் பாடுங்கள்; உலகெங்கும் வாழ்வோரே, ஆண்டவரைப் போற்றிப் பாடுங்கள்;2aஆண்டவரைப் போற்றிப் பாடுங்கள்; அவர் பெயரை வாழ்த்துங்கள். – பல்லவி
2bஅவர் தரும் மீட்பை நாள்தோறும் அறிவியுங்கள்.3பிற இனத்தார்க்கு அவரது மாட்சியை எடுத்துரையுங்கள்; அனைத்து மக்களினங்களுக்கும் அவர்தம் வியத்தகு செயல்களை அறிவியுங்கள். – பல்லவி
7மக்களினங்களின் குடும்பங்களே, ஆண்டவருக்குச் சாற்றுங்கள்; மாட்சியையும் ஆற்றலையும் ஆண்டவருக்குச் சாற்றுங்கள்.8aஆண்டவரின் பெயருக்குரிய மாட்சியை அவருக்குச் சாற்றுங்கள். – பல்லவி
9தூய கோலத்துடன் ஆண்டவரை வழிபடுங்கள்; உலகெங்கும் வாழ்வோரே, அவர் திருமுன் நடுங்குங்கள்.10acவேற்றினத்தாரிடையே கூறுங்கள்; ஆண்டவரே ஆட்சி செய்கின்றார்; அவர் மக்களினங்களை நீதி வழுவாது தீர்ப்பிடுவார். – பல்லவி
இரண்டாம் வாசகம்
தூய ஆவியார் தம் விருப்பம்போல் ஒவ்வொருவருக்கும் கொடைகளைப் பகிர்ந்தளிக்கிறார்.
திருத்தூதர் பவுல் கொரிந்தியருக்கு எழுதிய முதல் திருமுகத்திலிருந்து வாசகம் 12: 4-11
சகோதரர் சகோதரிகளே,
அருள் கொடைகள் பலவகையுண்டு; ஆனால் தூய ஆவியார் ஒருவரே. திருத்தொண்டுகளும் பலவகையுண்டு; ஆனால் ஆண்டவர் ஒருவரே. செயல்பாடுகள் பலவகையுண்டு; ஆனால் கடவுள் ஒருவரே. அவரே எல்லாரிடமும் எல்லாவற்றையும் செயல்படுத்துபவர்.
பொது நன்மைக்காகவே தூய ஆவியாரின் செயல்பாடுகள் ஒவ்வொருவரிலும் வெளிப்படுகிறது. தூய ஆவியார் ஒருவருக்கு ஞானம் நிறைந்த சொல்வளத்தை அருளுகிறார். இன்னொருவருக்கோ அதே ஆவியார் அறிவு செறிந்த சொல்வளத்தை அளிக்கிறார். அதே ஆவியார் வேறொருவருக்கு நம்பிக்கை அருளுகிறார். அந்த ஒரே ஆவியார் மற்றொருவருக்குப் பிணி தீர்க்கும் அருள் கொடையையும் அளிக்கிறார். தூய ஆவியார் ஒருவருக்கு வல்ல செயல் செய்யும் ஆற்றலையும், இன்னொருவருக்கு இறைவாக்கு உரைக்கும் ஆற்றலையும், வேறொருவருக்கு ஆவிக்குரியவற்றைப் பகுத்தறியும் ஆற்றலையும், மற்றொருவருக்குப் பல்வகை பரவசப் பேச்சுப் பேசும் ஆற்றலையும், பிறிதொருவருக்கு அப்பேச்சை விளக்கும் ஆற்றலையும் அருளுகிறார்.
அந்த ஒரே ஆவியாரே இவற்றையெல்லாம் செயல்படுத்துகிறார்; அவரே தம் விருப்பம்போல் ஒவ்வொருவருக்கும் இவற்றைப் பகிர்ந்தளிக்கிறார்.
– இது ஆண்டவர் வழங்கும் அருள்வாக்கு.
நற்செய்திக்கு முன் வாழ்த்தொலி
2 தெச 2: 14
அல்லேலூயா, அல்லேலூயா! நம் ஆண்டவர் இயேசு கிறிஸ்துவின் மாட்சியை நீங்கள் அடையும் பொருட்டே, நாங்கள் அறிவித்த நற்செய்தியின் வழியாக அவர் உங்களை அழைத்தார். அல்லேலூயா.
நற்செய்தி வாசகம்
கானாவில் இயேசு செய்த முதல் அரும் அடையாளத்தில் தம் மாட்சியை வெளிப்படுத்தினார்.
✠ யோவான் எழுதிய தூய நற்செய்தியிலிருந்து வாசகம் 2: 1-12
கலிலேயாவில் உள்ள கானாவில் திருமணம் ஒன்று நடைபெற்றது. இயேசுவின் தாயும் அங்கு இருந்தார். இயேசுவும் அவருடைய சீடரும் அத்திருமணத்திற்கு அழைப்புப் பெற்றிருந்தனர். திருமண விழாவில் திராட்சை இரசம் தீர்ந்துபோகவே இயேசுவின் தாய் அவரை நோக்கி, “திராட்சை இரசம் தீர்ந்துவிட்டது” என்றார். இயேசு அவரிடம், “அம்மா, அதைப் பற்றி நாம் என்ன செய்ய முடியும்? எனது நேரம் இன்னும் வரவில்லையே” என்றார். இயேசுவின் தாய் பணியாளரிடம், “அவர் உங்களுக்குச் சொல்வதெல்லாம் செய்யுங்கள்” என்றார்.
யூதரின் தூய்மைச் சடங்குகளுக்குத் தேவையான ஆறு கல்தொட்டிகள் அங்கே இருந்தன. அவை ஒவ்வொன்றும் இரண்டு மூன்று குடம் தண்ணீர் கொள்ளும். இயேசு அவர்களிடம், “இத்தொட்டிகளில் தண்ணீர் நிரப்புங்கள்” என்று கூறினார். அவர்கள் அவற்றை விளிம்புவரை நிரப்பினார்கள். பின்பு அவர், “இப்போது மொண்டு பந்தி மேற்பார்வையாளரிடம் கொண்டுபோங்கள்” என்று அவர்களிடம் கூறினார். அவர்களும் அவ்வாறே செய்தார்கள்.
பந்தி மேற்பார்வையாளர் திராட்சை இரசமாய் மாறியிருந்த தண்ணீரைச் சுவைத்தார். அந்த இரசம் எங்கிருந்து வந்தது என்று அவருக்குத் தெரியவில்லை; தண்ணீர் மொண்டு வந்த பணியாளருக்கே தெரிந்திருந்தது. ஆகையால் பந்தி மேற்பார்வையாளர் மணமகனைக் கூப்பிட்டு, “எல்லாரும் நல்ல திராட்சை இரசத்தை முதலில் பரிமாறுவர்; யாவரும் விருப்பம்போலக் குடித்தபின்தான் தரம் குறைந்த இரசத்தைப் பரிமாறுவர். நீர் நல்ல இரசத்தை இதுவரை பரிமாறாமல் ஏன் வைத்திருந்தீர்?” என்று கேட்டார்.
இதுவே இயேசு செய்த முதல் அரும் அடையாளம். இது கலிலேயாவில் உள்ள கானாவில் நிகழ்ந்தது. இதன் வழியாக அவர் தம் மாட்சியை வெளிப்படுத்தினார். அவருடைய சீடரும் அவரிடம் நம்பிக்கை கொண்டனர். இதன் பிறகு அவரும் அவர் தாயும் சகோதரர்களும் அவருடைய சீடரும் கப்பர்நாகும் சென்று அங்குச் சில நாள்கள் தங்கியிருந்தனர்.
– இது கிறிஸ்து வழங்கும் நற்செய்தி.
நம்பிக்கையாளரின் மன்றாட்டுகள்
- எல்லாம் வல்ல மூவொரு இறைவா! திருஅவைப்பணியாளர்கள் தூய ஆவியின் ஆற்றலைப் பெற்றவர்களாய், அன்னையாம் திரு அவையின் உமது அன்பு இரசத்தின் நிறை உண்மையின் பாதையில் வழிநடக்கப் போதித்திட வேண்டுமென்று இறைவா உம்மை மன்றாடுகிறோம்.
- புதுமைகளின் நாயகனாம் மகிமை நிறை இறைவா! உமது பிள்ளைகளான நாம் ஒவ்வொருவரும் “அவர் உங்களுக்குச் சொல்வதெல்லாம் செய்யுங்கள்” என எமக்கு வேண்டுதல் விடுக்கும் தேவஅன்னையின் சொல்லுக்குக் கட்டுப்பட்ட பிள்ளைகளாக வாழ்ந்திட எம்மை வழிநடத்திட வேண்டுமென்று இறைவா உம்மை மன்றாடுகிறோம்.
- பெலத்தின் ஆவியாகிய இறைவா! அருட்பணியாளர்கள், அருட்சகோதரிகள் அனைவரும், உமது இறைமாட்சியை உலகிற்கு பறைசாற்றுபவர்களாக திகழ்ந்து, வாழ்வின் அனைத்துப் போராட்டங்களிலும் பரிசுத்த ஆவியின் வல்லமையால் நீர் அளிக்கும் மீட்பை சுவைத்து மகிழ வரமருள வேண்டுமென்று இறைவா உம்மை மன்றாடுகிறோம்.
- கானா ஊரில் கனி இரசம் பெருகச் செய்த இறைவா! தற்போது உலகெங்கும் நிகழ்ந்து கொண்டிருக்கும் பல்வேறு இயற்கை அனர்த்தங்களினால் துன்புறும் மக்களின் குறைப்போக்கி விரைவில் நல்வாழ்வு துளிர்க்கச் செய்ய இறைவா உம்மை மன்றாடுகின்றோம்.
