திருவருகைக்காலம் 3ஆம் ஞாயிறு (15 டிசம்பர் 2024)
திருப்பலி முன்னுரை
இத்திருவருகைக் காலத்தில் 3ம் வாரமாகிய மகிழ்ச்சியின் வாரத்தினுள் நாம் நுழைகின்றோம். இன்றைய ஞாயிறு இறைவார்த்தை வழிபாடானது எம் அனைவரையும் பாவமன்னிப்பை பெற்று, ஒளிக்கு சான்று பகரக்கூடிய மகிழ்ச்சியான வாழ்வு வாழ அழைக்கின்றது.
எருசலேம் மக்களுக்கு ஆண்டவர் அருளவிருக்கும் மகிழ்ச்சியை இறைவாக்கினர் செப்பனியா எடுத்துரைப்பதை முதல் இறைவாக்கிலும், புனித பவுல் ஆண்டவரில் அகமகிழ்ந்திட அழைப்பதை இரண்டாம் இறைவாக்கிலும் வாசிக்க கேட்போம். நற்செய்தியில் திருமுழுக்கு யோவான் மக்களை தன் பக்கம் ஈர்க்காமல், உலகின் ஒளியாகிய இயேசுவின் பக்கமே அழைப்பதை ஆழமாக தெளிவுபடுத்துகின்றார் புனித லூக்கா.
அன்று பாலைவனத்தில் ஒலித்த யோவானின் குரல் இன்று நம் உள்ளங்களிலும் ஒலிக்கட்டும். நன்றியோடு கூடிய இறைவேண்டல், மன்றாட்டு வழியாக நமது தேவைகளை விண்ணப்பித்து, ஆண்டவரில் அகமகிழ வரம் கேட்போம்.
முதல் வாசகம்
உன் பொருட்டு ஆண்டவர் மகிழ்ந்து களிகூருவார்.
இறைவாக்கினர் செப்பனியா நூலிலிருந்து வாசகம் 3: 14-17
மகளே சீயோன்! மகிழ்ச்சியால் ஆர்ப்பரி; இஸ்ரயேலே! ஆரவாரம் செய்; மகளே எருசலேம்! உன் முழு உள்ளத்தோடு அகமகிழ்ந்து அக்களி. ஆண்டவர் உன் தண்டனைத் தீர்ப்பைத் தள்ளிவிட்டார்; உன் பகைவர்களை அப்புறப்படுத்தினார்; இஸ்ரயேலின் அரசராகிய ஆண்டவர் உன் நடுவில் இருக்கின்றார்; நீ இனி எந்தத் தீங்கிற்கும் அஞ்சமாட்டாய். அந்நாளில் எருசலேமை நோக்கி இவ்வாறு கூறப்படும்; “சீயோனே, அஞ்சவேண்டாம்; உன் கைகள் சோர்வடைய வேண்டாம். உன் கடவுளாகிய ஆண்டவர் உன் நடுவில் இருக்கின்றார்; அவர் மாவீரர்; மீட்பு அளிப்பவர்; உன் பொருட்டு அவர் மகிழ்ந்து களிகூருவார்; தம் அன்பினால் உனக்குப் புத்துயிர் அளிப்பார்; உன்னைக் குறித்து மகிழ்ந்து ஆடிப்பாடுவார்.
– இது ஆண்டவர் வழங்கும் அருள்வாக்கு.
பதிலுரைப் பாடல்
எசா 12: 2-3. 4. 5-6 (பல்லவி: 6)
பல்லவி: ஆர்ப்பரித்து அக்களியுங்கள்; ஆண்டவர் சிறந்து விளங்குகின்றார்.
2 இறைவன் என் மீட்பர், அவர்மேல் நம்பிக்கை வைக்கிறேன், நான் அஞ்சமாட்டேன்; ஆண்டவரே என் ஆற்றல், அவரையே பாடுவேன், என் மீட்பும் அவரே. 3 மீட்பருளும் ஊற்றுகளிலிருந்து நீங்கள் அகமகிழ்வோடு தண்ணீர் முகந்துகொள்வீர்கள். – பல்லவி
4 ஆண்டவருக்கு நன்றி செலுத்துங்கள்; அவர் திருப்பெயரைப் போற்றுங்கள்; மக்களினங்களிடையே அவர் செயல்களை அறிவியுங்கள்; அவர் திருப்பெயர் உயர்க எனப் பறைசாற்றுங்கள். – பல்லவி
5 ஆண்டவருக்குப் புகழ்ப்பா அமைத்துப் பாடுங்கள்; ஏனெனில் அவர் மாட்சியுறும் செயல்களைப் புரிந்துள்ளார்; அனைத்துலகும் இதை அறிந்துகொள்வதாக. 6 சீயோனில் குடியிருப்போரே! ஆர்ப்பரித்து அக்களியுங்கள்; இஸ்ரயேலின் தூயவர் உங்களிடையே சிறந்து விளங்குகின்றார். – பல்லவி
இரண்டாம் வாசகம்
ஆண்டவர் அண்மையில் உள்ளார்.
திருத்தூதர் பவுல் பிலிப்பியருக்கு எழுதிய திருமுகத்திலிருந்து வாசகம் 4: 4-7
சகோதரர் சகோதரிகளே,
ஆண்டவரோடு இணைந்து என்றும் மகிழுங்கள்; மீண்டும் கூறுகிறேன், மகிழுங்கள். கனிந்த உங்கள் உள்ளம் எல்லா மனிதருக்கும் தெரிந்திருக்கட்டும். ஆண்டவர் அண்மையில் உள்ளார். எதைப்பற்றியும் கவலைப்பட வேண்டாம். ஆனால் நன்றியோடு கூடிய இறை வேண்டல், மன்றாட்டு ஆகிய அனைத்தின் வழியாகவும் கடவுளிடம் உங்கள் விண்ணப்பங்களைத் தெரிவியுங்கள். அப்பொழுது, அறிவெல்லாம் கடந்த இறை அமைதி கிறிஸ்து இயேசுவோடு இணைந்துள்ள உங்கள் உள்ளத்தையும் மனத்தையும் பாதுகாக்கும்.
– இது ஆண்டவர் வழங்கும் அருள்வாக்கு.
நற்செய்திக்கு முன் வாழ்த்தொலி
எசா 61: 1ac
அல்லேலூயா, அல்லேலூயா! ஆண்டவராகிய என் தலைவரின் ஆவி என்மேல் உள்ளது; ஒடுக்கப்பட்டோருக்கு நற்செய்தி அறிவிக்க என்னை அனுப்பியுள்ளார். அல்லேலூயா.
நற்செய்தி வாசகம்
நாங்கள் என்ன செய்யவேண்டும்?
✠ லூக்கா எழுதிய தூய நற்செய்தியிலிருந்து வாசகம் 3: 10-18
அக்காலத்தில்
திருமுழுக்கு யோவான் போதித்துக்கொண்டிருந்தபோது, “நாங்கள் என்ன செய்ய வேண்டும்?” என்று கூட்டத்தினர் அவரிடம் கேட்டனர். அதற்கு அவர் மறுமொழியாக, “இரண்டு அங்கிகளை உடையவர் இல்லாதவரோடு பகிர்ந்து கொள்ளட்டும்; உணவை உடையவரும் அவ்வாறே செய்யட்டும்” என்றார். வரிதண்டுவோரும் திருமுழுக்குப் பெற வந்து, “போதகரே, நாங்கள் என்ன செய்யவேண்டும்?” என்று அவரிடம் கேட்டனர். அவர், “உங்களுக்குக் குறிக்கப்பட்ட தொகைக்கு அதிகமாக எதையும் தண்டாதீர்கள்” என்றார்.
படைவீரரும் அவரை நோக்கி, “நாங்கள் என்ன செய்ய வேண்டும்?” என்று கேட்டனர். அவர், “நீங்கள் எவரையும் அச்சுறுத்திப் பணம் பறிக்காதீர்கள்; யார்மீதும் பொய்க் குற்றம் சுமத்தாதீர்கள்; உங்கள் ஊதியமே போதும் என்றிருங்கள்” என்றார். அக்காலத்தில் மக்கள் மீட்பரை எதிர்பார்த்துக் கொண்டிருந்தார்கள். ஒருவேளை யோவான் மெசியாவாக இருப்பாரோ என்று எல்லாரும் தங்களுக்குள் எண்ணிக்கொண்டிருந்தார்கள். யோவான் அவர்கள் அனைவரையும் பார்த்து, “நான் தண்ணீரால் உங்களுக்குத் திருமுழுக்குக் கொடுக்கிறேன்; ஆனால் என்னைவிட வலிமைமிக்க ஒருவர் வருகிறார். அவருடைய மிதியடி வாரை அவிழ்க்கக்கூட எனக்குத் தகுதியில்லை. அவர் தூய ஆவி என்னும் நெருப்பால் உங்களுக்குத் திருமுழுக்குக் கொடுப்பார். அவர் சுளகைத் தம் கையில் கொண்டு கோதுமையையும் பதரையும் பிரித்தெடுப்பார். கோதுமையைத் தம் களஞ்சியத்தில் சேர்ப்பார்; பதரையோ அணையா நெருப்பிலிட்டுச் சுட்டெரிப்பார்” என்றார். மேலும் பல அறிவுரைகள் கூறி மக்களுக்கு நற்செய்தியை அறிவித்தார்.
– இது கிறிஸ்து வழங்கும் நற்செய்தி.
நம்பிக்கையாளரின் மன்றாட்டுகள்
- திருத்தந்தை, ஆயர்கள், குருக்கள், துறவறத்தார் அனைவருக்கும் திருச்சபை எதிர்கொள்கின்ற அனைத்துவிதமான சாவல்களுக்கு முகம் கொடுக்கக்கூடிய உடல் உள ஆன்மீக ஆரோக்கியத்தை இவர்களுக்கு வழங்க வேண்டுமென்று இறைவா உம்மை மன்றாடுகின்றோம்.
- கிறிஸ்தவர்களாகிய நாம் அனைவரும் எமது வாழ்க்கையில் எந்த சூழ்நிலையிலும் என்ன நேர்ந்தாலும் உமக்கு நன்றியுள்ளம் கொண்டவர்களாக வாழ்ந்து, உம் பெயரை பறைசாற்றி, சான்று பகரும் வாழ்வு வாழ வரம் தரவேண்டுமென்று இறைவா உம்மை மன்றாடுகின்றோம்.
- ஒரே சமூகமாக குழுமியிருக்கும் நாம் உமது ஆவியின் கனிகளை, அதிலும் சிறப்பாக மகிழ்ச்சி என்னும் கனியினை நாமும் அனுபவித்து பிறரும் அனுபவிக்க வரம் தரவேண்டுமென்று இறைவா உம்மை மன்றாடுகின்றோம்.
- தூய திருமுழுக்கு யோவான் போதித்தவாறு, நம் ஒவ்வொருவரது வாழ்விலும் தேவைப்படும் மாற்றங்களை நாம் உண்டுபண்ணி, உம் திருமகனின் பிறப்பிற்காக தகுந்த ஆயத்தங்களை மேற்கொள்ள வரம் தரவேண்டுமென்று இறைவா உம்மை மன்றாடுகின்றோம்.
