சூரிக் பணியகத்தின் குழந்தை இயேசு திருவிழா 01-09-2024 சூரிக் திரு இருதய ஆண்டவர் ஆலயத்தில் நடைபெற்றது. சுவிஸ் தமிழ்க்கத்தோலிக்க ஆன்மிகப்பணியக இயக்குநர் அருட்பணி. யூட்ஸ் முரளிதரன் அவர்களின் வழிகாட்டலில் இத்திருவிழா ஒழுங்கமைக்கப்பட்டு, 31-08-2024 சனிக்கிழமை 18.30 மணிக்கு குழந்தை இயேசு திருவிழா ஆயத்த மாலைப்புகழ் வழிபாடும், 01-09-2024 ஞாயிற்றுக்கிழமை 15.30 மணிக்கு குழந்தை இயேசு திருவிழாத் திருப்பலியும் நடைபெற்றது.
மன்னார் மறைமாவட்ட குருமுதல்வர் அருட்பணி கிறிஸ்து நாயகம் அவர்களின் தலைமையில், உரோமையில் உயர் கல்வி கற்கும் அருட்பணி. பிரசாந் அமதி, எமது ஆன்மிக இயக்குனர் அருட்பணி. யூட்ஸ் முரளிதரன் ஆகியோரும் இணைந்து இத்திருவிழாத்திருப்பலியினை ஒப்புக்கொடுத்தனர்.
திருப்பலியினைத் தொடர்ந்து குழந்தை இயேசுவின் திருச்சுரூப பவனி நடைபெற்றது. தொடர்ந்து மன்னார் மறைமாவட்ட குருமுதல்வர் அருட்பணி. கிறிஸ்துநாயகம் அவர்களால் குழந்தை இயேசுவின் திருச்சுரூப ஆசீர் வழங்கப்பட்டது. இறுதியில் பணியக இறைமக்களால் உறவு ஒன்றிப்பை வலுப்படுத்தும் வகையில் சிற்றுண்டி உபசார நிகழ்வும் இடம்பெற்றது. இத்திருவிழாவிற்கு ஏனைய மானிலங்களைச் சார்ந்த பணியக இறைமக்களும் உணர்வுபூர்வமாக பங்கேற்று குழந்தை இயேசுவின் ஆசீரைப் பெற்று மகிழ்ந்தனர்.