பொதுக்காலம் இருபத்தேழாம் ஞாயிறு
2022.10.02
முன்னுரை
அன்புமிக்க சகோதர சகோதரிகளே! மீட்பளிக்கும் பாறையாம் நம் ஆண்டவர் இயேசுவின் திருப்பெயரால் நல்வாழ்த்துகள் கூறி இத் திருப்பலிக் கொண்டாட்டத்திற்கு உங்களை அன்போடு வரவேற்கின்றோம். இன்று நாம் திருவழிபாட்டு ஆண்டின் பொதுக்காலம் இருபத்தேழாம் ஞாயிறு தினத் திருப்பலியைக் கொண்டாடுகின்றோம்.
நம் கடவுளின் வாக்குறுதிகள் ஒருக்காலும் பொய்க்காது. அது காலந்தாழ்த்தி வருவதாகத் தோன்றினால், எதிர்பார்த்துக் காத்திரு; அது நிறைவேறியே தீரும். இந்த நம்பிக்கை உறுதியோடு இருக்கும் போது நாம் வாழ்வைப் பெறுகின்றோம் என்னும் உண்மை நமக்கு இன்று ஆழமாக உணர்த்தப்படுகின்றது. இதையேதான் நம் ஆண்டவர் இயேசுவும், ‘கடுகளவு நம்பிக்கை உங் களுக்கு இருந்தால் நீங்கள் இந்தக் காட்டு அத்தி மரத்தை நோக்கி, நீ வேரோடே பெயர்ந்து போய்க் கடலில் வேருன்றி நில் எனக் கூறினால் அது உங்களுக்குக் கீழ்ப்படியும்” என்று சொல்லுகின்றார்
எனவே, ‘நம் ஆண்டவரின் வார்த்தையோ என்றென்றும் நிலைத்திருக்கும்’ என்னும் மனவுறுதியோடு இறைவனின் விருப்பம் நிறைவேறக் காத்திருக்கும் நல்லுள்ளத்தையும், இறைவனைச் சோதிக்காதிருக்கும் நல்லுள்ளத்தையும் கேட்டுத் தொடரும் பலியில் பங்கேற்போம்.
முதல் வாசகம்
நேர்மையுடையவரோ தம் நம்பிக்கையினால் வாழ்வடைவர்.
இறைவாக்கினர் அபக்கூக்கு நூலிருந்து வாசகம் 1: 2- 3; 2:2-4
ஆண்டவரே, எத்துணைக் காலத்திற்கு நான் துணைவேண்டிக் கூக்குரலிடுவேன்; நீரும் செவிசாய்க்காதிருப்பீர்? இன்னும் எத்துணைக் காலத்திற்கு வன்முறையை முன்னிட்டு உம்மிடம் அழுது புலம்புவேன்; நீரும் எம்மை மீட்காமல் இருப்பீர்?
நீர் என்னை ஏன் கொடுமையைப் பார்க்கச் செய்கின்றீர், கேட்டினைக் காணச் செய்கின்றீர்? கொள்ளையும் வன்முறையும் என் கண்முன் நிற்கின்றன; வழக்கும் வாதும் எழும்புகின்றன.
ஆண்டவர் எனக்கு அளித்த மறுமொழி இதுவே: “காட்சியை எழுதிவை; விரைவாய் ஓடுகிறவனும் படிக்கும் வண்ணம் பலகைகளில் தெளிவாய் எழுது. குறித்த காலத்தில் நிறைவேறுவதற்காகக் காட்சி இன்னும் காத்திருக்கின்றது; முடிவை நோக்கி விரைந்து செல்கின்றது. ஒருக்காலும் பொய்க்காது. அது காலந்தாழ்த்தி வருவதாகத் தோன்றினால், எதிர்பார்த்துக் காத்திரு; அது நிறைவேறியே தீரும்; காலம் தாழ்த்தாது. இதை நம்பாதவரே உள்ளத்திலே நேர்மையற்றவராய் இருப்பர்; நேர்மையுடையவரோ தம் நம்பிக்கையினால் வாழ்வடைவர்.
ஆண்டவரின் அருள்வாக்கு.
பதிலுரைப்பாடல் திபா 95:1-2,6-9
பல்லவி: உங்கள் இதயத்தைக் கடினப்படுத்திக் கொள்ளாதீர்கள்.
வாருங்கள்; ஆண்டவரைப் புகழ்ந்து பாடுங்கள்; நமது மீட்பின் பாறையைப் போற்றி ஆர்ப்பரியுங்கள். நன்றியுடன் அவர் திருமுன் செல்வோம்; புகழ்ப்பாக்களால் அவரைப் போற்றி ஆர்ப்பரிப்போம்.
பல்லவி
வாருங்கள்; தாள்பணிந்து அவரைத் தொழுவோம்; நம்மை உருவாக்கிய ஆண்டவர்முன் முழந்தாளிடுவோம். அவரே நம் கடவுள்; நாமோ அவரது மேய்ச்சலின் மக்கள்; நாம் அவர் பேணிக்காக்கும் ஆடுகள். இன்று நீங்கள் அவரது குரலுக்குச் செவிகொடுத்தால் எத்துணை நலம்!
பல்லவி
அன்று மெரிபாவிலும், பாலை நிலத்தில் மாசாவிலும் செய்ததுபோல், உங்கள் இதயத்தைக் கடினப்படுத்திக் கொள்ளாதீர்கள். அங்கே உங்கள் மூதாதையர் என்னைச் சோதித்தனர்; என் செயல்களைக் கண்டிருந்தும் என்னைச் சோதித்துப் பார்த்தனர்.
பல்லவி
இரண்டாம் வாசகம்
நம் ஆண்டவருக்கு நீ சான்று பகர்வதைக் குறித்து வெட்கமடையத் தேவை இல்லை.
திருத்தூதர் பவுல் திமொத்தேயுவுக்கு எழுதிய இரண்டாம் திருமுகத்திலிருந்து வாசகம் 1:6-8, 13-14
அன்புக்குரியவரே,
உன்மீது என் கைகளை வைத்துத் திருப்பணியில் அமர்த்தியபோது உனக்குள் எழுந்த கடவுளின் அருள்கொடையினைத் தூண்டி எழுப்புமாறு நினைவுறுத்துகிறேன். கடவுள் நமக்குக் கோழை உள்ளத்தினை அல்ல, வல்லமையும் அன்பும் கட்டுப்பாடும் கொண்ட உள்ளத்தையே வழங்கியுள்ளார். எனவே நம் ஆண்டவருக்கு நீ சான்று பகர்வதைக் குறித்தோ அவர் பொருட்டு நான் கைதியாக இருப்பதைக் குறித்தோ வெட்கமடையத் தேவை இல்லை; கடவுளின் வல்லமைக்கேற்ப நற்செய்தியின் பொருட்டுத் துன்பத்தில் என்னுடன் பங்குகொள்.
கிறிஸ்து இயேசுவிடம் நம்பிக்கையும் அன்பும் கொண்டு என்னிடம் நீ கேட்ட நலந்தரும் வார்த்தைகளை மேல்வரிச் சட்டமாகக் கொள். நமக்குள் குடிகொள்ளும் தூய ஆவியால் ஒப்படைக்கப்பட்ட நல்ல போதனையைக் காத்துக்கொள்.
ஆண்டவரின் அருள்வாக்கு.
நற்செய்திக்கு முன் வாழ்த்தொலி 1பேது 1:25
அல்லேலூயா, அல்லேலூயா! நம் ஆண்டவரின் வார்த்தையோ என்றென்றும் நிலைத்திருக்கும். இவ்வார்த்தையே உங்களுக்கு அறிவிக்கப்பட்ட நற்செய்தி. அல்லேலூயா
நற்செய்தி வாசகம்
கடுகளவு நம்பிக்கை உங்களுக்கு இருந்தால்…
லூக்கா எழுதிய நற்செய்தியிலிருந்து வாசகம் 17:5-10
அக்காலத்தில்
திருத்தூதர்கள் ஆண்டவரிடம், “எங்கள் நம்பிக்கையை மிகுதியாக்கும்” என்று கேட்டார்கள். அதற்கு ஆண்டவர் கூறியது: “கடுகளவு நம்பிக்கை உங்களுக்கு இருந்தால் நீங்கள் இந்தக் காட்டு அத்தி மரத்தை நோக்கி, ‘நீ வேரோடே பெயர்ந்துபோய்க் கடலில் வேருன்றி நில்’ எனக் கூறினால் அது உங்களுக்குக் கீழ்ப்படியும்.
உங்கள் பணியாளர் உழுதுவிட்டோ மந்தையை மேய்த்துவிட்டோ வயல்வெளியிலிருந்து வரும்போது அவரிடம், ‘நீர் உடனே வந்து உணவருந்த அமரும்’ என்று உங்களில் எவராவது சொல்வாரா? மாறாக, ‘எனக்கு உணவு ஏற்பாடு செய்யும். உம் இடையை வரிந்துகட்டிக் கொண்டு, நான் உண்டு குடிக்கும்வரை எனக்குப் பணிவிடை செய்யும். அதன் பிறகு நீர் உண்டு குடிக்கலாம்’ என்று சொல்வாரல்லவா? தாம் பணித்ததைச் செய்ததற்காக அவர் தம் பணியாளருக்கு நன்றி கூறுவாரோ?
அது போலவே, நீங்களும் உங்களுக்குப் பணிக்கப்பட்ட யாவற்றையும் செய்தபின், ‘நாங்கள் பயனற்ற பணியாளர்கள்; எங்கள் கடமையைத்தான் செய்தோம்’ எனச் சொல்லுங்கள்.”
ஆண்டவரின் அருள்வாக்கு.
மன்றாட்டுக்கள்
1. மீட்பளிக்கும் பாறையாம் தந்தையே இறைவா! எம் திருத்தந்தை, ஆயர்கள், குருக்கள், துறவிகள், அனைவரும் நீர் அவர்களுக்குக் கொடுத்த பணிகள் யாவற்றையும் செய்தபின், நாங்கள் பயனற்ற பணியாளர்கள்; எங்கள் கடமையைத்தான் செய்தோம் என்னும் இதயத் தாழ்ச்சியோடு செயலாற்றுவதற்கு வேண்டிய வல்லமையை அளித்துக் காத்திட வேண்டுமென்று இறைவா உம்மை மன்றாடுகின்றோம்.
2. எம்மை உருவாக்கிய தந்தையே இறைவா! நீர் பேணிக்காக்கும் ஆடுகளாகிய நாங்கள் அனைவரும், ‘உமது வார்த்தையோ என்றென்றும் நிலைத்திருக்கும்’ என்னும் மனவுறுதியோடு உமது விருப்பம் நிறைவேறக் காத்திருக்கும் நல்லுள்ளத்தையும். உம்மைச் சோதிக்காதிருக்கும் நல்லுள்ளத்தையும் எமக்கு அளித்துக் காத்திட வேண்டுமென்று இறைவா உம்மை மன்றாடுகின்றோம்.
3. அரசர்க்கொல்லாம் அரசராகிய தந்தையே இறைவா! உலகில் பல்வேறு நிலைகளிலும் பணியாற்றும் தலைவர்கள் தங்கள் இதயத்தைக் கடினப்படுத்திக்கொள்ளாது, உமது குரலுக்குச் செவிகொடுப்பதன் வழியாக உலகில் மக்கள் அனைவருக்கும் நலந்தரும் அமைதியை உருவாக்க உழைப்பதற்கு வேண்டிய நல்லுள்ளத்தை அருளவேண்டுமென்று இறைவா உம்மை மன்றாடுகின்றோம்.
4. நலந்தரும் மருத்துவரே தந்தையே இறைவா! இன்று மாற்றமுடியாது என்று கைவிடப்பட்ட நோயாளர்களை உமது இரக்கத்தால் குணப்படுத்தியருள வேண்டுமென்றும், மக்களை அச்சுறுத்தும், நோய்களையெல்லாம் உமது இரக்கத்தால் குணப்படுத்தி மக்களை நிம்மதியோடு வாழச் செய்தருள வேண்டுமென்று இறைவா உம்மை மன்றாடுகின்றோம்.
